ROXAS CITY – Ginbawian sang kabuhi samtang ginabulong sa ospital ang 23-anyos nga anak matapos nga ginlabo sang kaugalingon nga amay sa Barangay Cabungahan, Maayon, Capiz.
Ginkilala ang biktima nga si Alden Salcedo nga nag-angkon sang patal nga pilas sa ulo kag lawas matapos ginlabo sang amay nga suspek nga si Ricky Salcedo, 40 –anyos.
Sa imbestigasyon sang mga pulis, nagaguwa nga magkaupod pa nga nag-inum ang mag-amay apang hinali nga nagbaisay ang duha.
Hinali nga ginluthang sang biktima ang amay gamit ang homemade shotgun kag nagbalos man ang suspek pinaagi sa paglabo sa anak gamit ang binangon.
Gilayon nga gindala sa ospital ang biktima apang ginbawian sang kabuhi bangud sa patal nga pilas sa ulo kag lawas.
Samtang wala na sang plano ang iloy sang biktima nga pasakaan sang kaso ang bana nga nagpatay sa ila anak.
