ROXAS CITY – Naka-hospital arrest sa karon ang anay alkalde sang banwa sang President Roxas, Capiz matapos gin-aresto sang mga miyembro sang Provincial Mobile Force Company kasunod sang pagpalupok sini sang armas sa sulod sang isa ka government facility sa Barangay Cabug-Cabug, sa nasambit nga banwa.
Suno kay Capiz Police Provincial Office Director Col. Canilo Fuentes, ginkilala ang suspek nga si Don Ramon Locsin nga anay alkalde sang banwa sang President Roxas.
Suno kay Fuentes, nakabaton ini sang tawag gikan sa isa ka concerned citizen nga may nabatian ini nga nagpalupok sang armas rason nga ginmanduan sang opisyal ang mga kapulisan nga padulungan ang lugar agud kumpirmahon ang nasambit nga impormasyon.
Ginaalegar nga ginpunggan pa sang pila ka mga kalalakihan ang mga miyembro sang PMFC nga magsulod sa lugar.
Diri kag narekober kay Locsin ang duha ka mga caliber .40 nga armas kag pila ka mga empty slugs man ang nakita sa lugar.
Kasunod sang pag-aresto kay Locsin, naglain ang pamatyag sini rason nga gindala ini sa ospital.
Gindugang pa ni Fuentes nga padayon man ang ila imbestigasyon natuhoy sa ila nabaton nga impormasyon nga may yara sang grupo sang armado nga mga indibidwal nga nagalibot sa nasambit nga lugar.
Ginaalegar nga ginhimo nga firing range sang grupo sang anay alkalde ang nasambit nga lugar nga nagtuga sang kakugmat sa mga residente.
Suno kay Fuentes nga kalakip sa posible pagaatubangon nga panumbungon ni Locsin amo ang Alarm and Scandal, Trespass to Government Property, Indiscriminate Firing kag Illegal Possession of Firearm.
