ROXAS CITY – Magapahuway na lamang sa iya nga balay si Presidente Rodrigo Duterte matapos ang iya nga termino bilang presidente sang Pilipinas.
Ini ang ginpahayag sang presidente sa iya nangin mensahe sang ginpangunahan sini ang decommissioning sang kapin 727 ka mga katapo sang Partido ng Manggagawa-Pilipinas/Revolutionary Proletarian Army/Alex Boncayao Brigade – Tabara-Paduano Group (RPM-P/RPA/ABB-TPG) nga karon ginatawag na nga KAPATIRAN sa 3rd Infantry Division (3ID) Philippine Army sa Camp Peralta, Jamindan, Capiz.
Suno sa presidente nga indi na siya interesado pa nga palawigon ang pagpungko sa pwesto.
Ginpahayag sang presidente nga dako ang posibilidad nga balusan siya sang dalagkuan nga mga indibidwal nga naiguan sang kampanya kontral ilegal nga droga sang iya administrasyon.
Partikular sini nga gintumod amo si anay Mayor Jed Patrick Mabilog.
Ginsal-ot sang presidente ang pangalan sang anay alkalde sa iya nga mensahe nga ginatudlo sini protektor sang ilegal nga droga.
