ROXAS CITY – Yara na sa kustodiya sang Police Regional Office (PRO-6) ang ginapatihan anay lider sang rebelde nga grupo sa Negros Oriental matapod ginserbihan sang apat ka mga warrants of arrest sa Poblacion Tacas, banwa sang Cuartero, Capiz.
Suno kay Captain Cenon Pancito III, tagpamaba sang PRO-6, ginkilala ang nadakpan kay Virgilo Paragan, 54 anyos, residente sang Barangay Sto. Angel, Dumalag, Capiz.
Ginpahayag pa ni Pancito nga nangin aktibo nga lider sang Roger Mahinay Command, Komiteng Rehiyon – Negros sang Communist Party of the Philippines – New Peoples Army (CPP-NPA) humalin tuig 2000 tubtob 2004.
Nagpauli sa probinsiya sang Capiz si Paragan bangud sa madamo sini nga mga kaso sa Negros Oriental may kahilabtanan sa pagpang-ambush sa mga tropa sang gobyerno kag ginapahayag pagpatay sa mga miyembro sang Armed Forces of the Philippines kag Citizen Armed Force Geographical Unit (CAFGU).
Dugang pa diri, ginrekomendar sang Police Regional Office 7 nga malakip sa Directorate for Intelligence List of Wanted Persons si Paragan kag nalakip man sa Joint Order CNN/ Terrorist Wanted Person sang Department of the Interior and Local Government kag Department of the National Defense (DILG-DND) nga may P1,050,000 nga patong sa ulo.
Ginapahayag pa nga naggamit si Paragan sang pangalan nga Baltasar Saldo sa iya nga pagpauli sa banwa sang Dumalag kag nagdesisyon nga magpangabuhi sang normal.
Natukiban sang mga otoridad nga si Paragan amo si Saldo matapos positibo nga ginkilala sang bata sang anay rebelde.
Ang nasambit nga suspek ang nadakpan sang gintingob nga pwersa sang PRO 6, Regional Intelligence Division kag 61st Infantry Battalion sa pagserbe sang duha ka warrants of arrest sa kaso nga murder kag duha man ka warrants of arrest sa kaso nga attempted murder.
