ROXAS CITY – Ginakabig sang anay alkalde sa banwa sang Pilar nga trial by publicity ang isyu nga ginapaguwa sa iya kag sa iya pamilya sang pihak nga kampo.
Ini ang nangin pahayag ni Anay Pilar Mayor Gideon Ike Patricio angut sa ginpasaka nga criminal complaint sang grupo nga Transparency and Accountability Task Force batuk sa iya, sa anak nga si incumbent Sangguniang Bayan (SB) member Mitchelle John Patricio, kag sa mag-asawa nga Leonard Fernandez kag Ma. Paz Patricio-Fernandez sang Barangay Poblacion, Pilar, Capiz sa Office of the Ombudsman Visayas.
Suno sa anay opisyal nga para sa iya nga trial by publicity ang amo nga isyu, bangud wala pa sila nakabaton sang subpoena gikan sa Ombudsman kag gintuon pa sa nagahilapit nga eleksyon sang Philippine Councilor’s League Capiz chapter ang pagpaguwa sang isyu.
Nagapati si Patricio nga may malisya kag pagpanghingabot ang amo nga isyu , apang nagpasalig ini nga ila ini sabton sa proper venue.
Ginapanindugan pa sang anay alkalde nga wala sila sang dapat kahadlukan bangud may ginauyatan man sila nga ebedensiya nga magapamatood nga inosente sila sa amo nga akusasyon.
Samtang nagpangabay ini sa nagapungko karon sa posisyon sa Pilar nga sa baylo hingabuton siya kag ang iya pamilya, mas maayo nga magconcentrate na lamang ini sa pagpaayo sa ila banwa nga kasubong sa iya slogan nga ”Bangon Pilar’ sa Pagbag-o” nga iya man ginpromesa sa mga Pilareño
