ROXAS CITY – Magapangatubang sa karon sa panumbungon nga paglapas sa Republic Act 9165 ukon Comprehensive Dangerous Drugs Act of 2002 ang isa ka anay preso matapos liwat naman nga nadakpan sa ginkasa nga drug buybust operation sang mga katapo sang Station Drug Enforcement Unit (SDEU) sang Roxas City PNP sa Barangay Tanque, Roxas City.
Ginkilala ang naaresto nga si Kirste Imam, 29 anyos kag residente man sang nasambit nga lugar.
Sa interview sang Bombo Radyo sa tagpamaba sang Roxas City PNP nga si Police Master Sergeant Ramil Arcangeles, ginpahayag sini nga naaresto sadto ang suspek sa isa man ka drug buybust operation apang nakahilway ini pinaagi sa plea bargaining agreement.
Matapos na-monitor nga nagbalik ini sa iya ilegal nga aktibidad liwat nga ginpaidalom sang mga otoridad sa monitoring ang suspek antes ginkasa ang operasyon.
Narekober sa suspek ang 5 sachets sang shabu, P1, 000 nga marked money kag cellphone.
Hugot naman nga ginpanginwala sang suspek nga iya ang narekober nga mga droga bangud suno diri nakibot lamang siya sang nagsulod ang mga kapulisan sa ila nga balay.
