ROXAS CITY – Wala sang nakita nga malain ang Provincial Administrator sa iya ginpost angut sa Audit Observation Memorandom (AOM) bangud ini ang nagapamangkot gid lamang.
Ini ang ginpahayag ni Edwin Chinel Monares sang ma-interview sang Bombo Radyo Roxas.
Ginpahayag ni Monares nga madamo sa kontra ni Gov. Esteban Evan Contreras ang nagapalapta sa probinsya sang Capiz nga may yara sila sang AOM nga kapin P200 milyon kag ginapahayag nga may yara sang korapsyon, gani ini ang iya gintun-an kag nagkonsulta sa iya mga kaupdanan kag abogado, pagkatapos sadto nagsulat siya sa Commission on Audit (COA) nga nagapamangkot kun ang AOM isa ka korapsyon.
Apang suno diri, nagsabat ang COA nga indi ini isa ka korapsyon, observation gid lamang ini sa mga magamay nga butang nga kinahanglan mahatagan sang sabat.
Dugang pa ni Monares nga nagpahayag ang COA nga wala sila sang nakita nga korapsyon sa AOM bangud ini ang nasabat na sang provincial government.
Ginpahayag sang Provincial Administrator nga indi sang malisyoso kag wala siya nagapatalang sa mga pumuluyo, nagapamangkot gid lamang ini bangud kun ang provincial government may yara sang AOM kag ginapahayag nagapangorakot paano nalang ang City government nga may yara man sang AOM nga ginpadala ang COA?
Luyag gid lamang niya mag-eksplekar ang City bangud palarehas malang ang tanan nga AOM.
Ginpanindugan man sini nga wala siya sang ginsambit nga tinaga sa iya post nga “PPE” kag wala man ini sang intensiyon nga pakalainon ang City government.
Welcome man suno diri kun siya ang pagapasakaan sang kaso ni Mayor Ronnie Dadivas bangud suno diri ang pagpasaka sang kaso wala ginahambal kundi ginahimo.
