ROXAS CITY – Nangin madinalag-on ang oath taking ni Fredinil “Oto” Castro bilang panibag-o nga gobernador sa probinsya sang Capiz nga ginhiwat kahapon nga aldaw sa guwa sang Provincial Capitol kaupod ang iya pamilya.
Pagkatapos sini magpanumpa, ginpabati sang gobernador ang iya inaugural speech kun sa diin ginpahayag sini ang iya plano kag promisa sa pumuluyo kag iban pa nga opisyales sa probinsya.
Suno diri, ang gobyerno probinsyal ang bukas sa tanan kag wala ini sang duag nga pagalantawon nga nagarepresentar sa mga kandidato kundi bilang opisyal sang probinsya kag banwa, ang makita lamang sini nga duag amu ang puti.
Matigdas pa nga ginsiling sang gobernador nga indi siya ang boss kag hari, siya lamang ang ginpili nga gobernador nga magaserbisyo kag magdumala sa probinsya kag suno diri, siya kaupod ang sangguniang bayan, ang suluguon sang pumuluyo kag ang Capiznon amu ang ila agalon.
Dugang pa sini, ang yara sa iya administrasyon kalakip ang miyembro sang sangguniang panlalawigan, department heads, kag mga hepe sa tanan nga talatapan ang magapanabat kun indi nila mahatag ang dapat mahatag sa pumuluyo.
Ginsiguro man ni Governor Castro nga mangin madinalag-on ang sa karon nga administrasyon pinaagi sa paghiusa kag suporta sang tagsa ka mga opisyales sang gobyerno ilabi na sang mga alkalde sang tagsa ka banwa kag syudad.
