PANITAN CAPIZ – Pilason ang duha ka persona, matapos nagbungguanay ang mga ginamaneho sini nga angkar-angkar kag tricycle sa Barangay Tabuc Sur, Panitan Capiz.
Ginkilala ang driver sang angkar-angkar kay alyas Tonyo, 35-anyos, mangunguma kag back rider sini nga menor de edad nga residente sa nasambit nga lugar samtang ang driver naman sang tricycle ang ginkilala kay alyas Jovy, 56-anyos kag residente naman sang Barangay Capagao sa amu man nga banwa.
Sa interview sang Bombo Radyo kay PMSGT. Manuel Kenneth Anisco sang Panitan Municipal Police Station, ginpahayag sini nga samtang nakaparada ang angkar-angkar sang biktima sa guha sang ila puluy-an hinali na lamang ini nga ginbungguan sang tricycle nga Kawasaki Bajaj nagaduag asul nga ginamaneho ni alyas Jovy nga padulong kuntani sa Barangay Capagao.
Bangud sa impact sang pagkabunggo, nag-angkon sang pilas sa magkatuhay nga bahin sang lawas ang biktima kag sakay sini nga madasig naman ginrespondihan sang katapo sang Panit-an Municipal Disaster Risk Reduction Management Office (MDRRMO) agud hatagan sang pauna nga pagbulong antes ginpadangat sa ospital para sa nagakaigo nga pagbulong.
Nahibaluan nga yara sa impluwensya sang makahulubog nga ilimnon ang driver sang tricycle sang matabo ang insidente.
Sa karon, nagapabilin sa kustodiya sang Panitan Municipal Police Station ang nasambit nga mga behikulo, para sa nagakaigo nga disposisyon.
