ROXAS CITY – Ginsabat sang Provincial Disaster Risk Reduction Management Office ang mga anomalya nga gina-isyu natuhoy sa paggasto sang calamity fund sang 2021.
Sa interview sang Bombo Radyo kay Mrs. Judy Grace Pelaez, pinuno sang PDRRMO, gintadlong sini ang mga pagpatalang nga nagalapta sa social media sa discrepancy ukon iregularidad sa paggamit sang calamity fund sang tuig 2021.
Ginpunto sini nga lain ang appropriation sa utilization kun sa din ang nagalapta nga working paper sa social media amo ang appropriation ukon gintalana nga budget para sa programa.
Ang Audit Observation Memorandum (AOM) sang Commission on Audit (COA) amo ang pagpahayag sang rekomendasyon nga iga-specify ang aktibidad ukon proyekto para sa PDRRM nga mga programa.
Ginklaro sini nga ang P1.7M nga budget para sa duwa ka adlaw nga catering nga nagalapta sa social media ang indi matuod bangud P40,000 gid lamang ang nagasto sa catering sa para sa preparasyon sa bagyong Auring.
Nalakip man diri ang PIATF Meeting para sa duwa ka adlaw nga deployment preparation, 2 ka bulan nga pagkaon sang border control personnel, Regional Incident Management Team meeting kag field evaluation, lima ka adlaw nga pagkaon para sa mga volunteers nga nagpreparar sang family food pack nagikan sa DSWD, kag para sa tatlo ka adlaw nga deployment sang pista minatay.
Ginpahayag ni Pelaez nga wala sini naubos ang masobra 1.7M nga budget kag may yara pa sang balanse nga P802,500 kun sa din P970,300 lamang ang nagasto.
Samtang P1.5M naman ang gintalana para sa miscellaneous kag other disaster expenses, kasubong sang pag mintinar kag pagpakay-o sang emergency vehicle, pagpakay-o sang computers, photocopiers, distribution sang financial assistance kag pag update sang PDRRM plan.
Gin-athag man sini nga wala sang kamatuoran nga tag-P4, 000 ang bilog sang sweatshirt kundi yara gid lamang sa P380 kag may yara lang sang P190,000 nga nagasto diri para sa 500 ka mga tawo.
Ginhatagan man sang pagtamod ni Pelaez, nga indi buot silingon nga isa lang ka programa ang gingastusan, isa lang man ang aktibidad sini kay sa pagkamatuod madamo ini.
Ginpanindugan pa sang opisyal nga sa nasambitan nga AOM wala man sang may nakita nga iregularidad ukon masobra nga expenses sa dapat nga paga-gastusan ang COA.
