Ginpasakaan na sang kaso ang anum ka mga indibidwal nga nagapatigayon sang illegal nga sugal nga ginatwag “tong-its” sa Barangay Bago Chiquito, Panay, Capiz.
Ang mga nadakpan amo sanday alyas toto, 65-anyos, alyas June, 44-anyos, alyas Fred, 70-anyos, alyas Frans, 69-anyos, alyas Jess, 63-anyos, alyas Lil, 33-anyos nga lunsay mga residente sang nasmabit nga barangay.
Sa interview sang Bombo Radyo kay Police Staff Sargeant Vicente Baleriado, imbestigador sang Panay Municipal Police Station, iya ginpahayag nga may nanawag nga concern citizen sa ila nga talatapan nga may nagapatigayon sang illegal nga pasugal.
Nakuha naman sa paghinakop sang mga nadakpan ang duha ka set sang playing cards kag P801.25 nga balor sang taya.
Nagpanawagan naman ang natungdan sa publiko nga likawan ang pagpatigayon sang mga illegal nga buluhaton agud mapabilin ang kalinong kag katawhay sa palibot.
