Pilason ang apat ka mga indibidwal matapos ginbuno kag ginsumbag sa Sitio Looban, Barangay Inzo Arnaldo, Roxas City .
Ang mga biktima amo sanday alyas Jose, 31 anyos, alyas Marlon, 28-anyos, Alyad John, 24 anyos kag alyas Joselito, 24 anyos nga lunsay residente sang nasambit nga lugar.
Samtang ang mga suspek amo sanday alyas Romeo, 35-anyos kag alyas Rolan.
Sa interview sang Bombo RAdyo kay Police Lieutenant Colonel Rogelio Tomagtang Jr., hepe sang Roxas Component City Police Station, iya ginpahayag nga nakabaton sila sang tawag gikan sa ospital nga nagapahibalo nga may pila ka biktima sang stabbing incident ang gindala sa ospital agud bulongon.
Suno kay Tomagtang, base sa ila inisyal nga imbestigasyon, nagainom-inom sanday alyas Jose kag alyas Marlon sa guwa sang balay sang ila pakaisa sang hinali na lang nag-abot ang suspek.
Sa wala pa mahibaluan nga rason, hinali lang nga ginbuno sang suspek si alyas Jose sa wala nga kamot kag si alyas Marlon sa likod sang iya lawas .
Sang mabatian ang kinagamo,nagguwa sanday alyas Joselito kag alyas John agud kuntani magtambag , apang, pati sila ang ginnbuno man sang suspek.
Pahayag pa sini, sandig sa pahayag ni alyas Joselito nga ginsumbag ini sang bata sang suspek
samtang nagakatabo ang kinagamo.
Sa subong, naga padayon ang hot pursuit operation sang Roxas City Police Station agud madakpan ang nakapalagyo nga suspek nga si alyas Romeo samtang nadakpan naman kag preso na si alyas Rolan.
