Dakop sa akto ang Apat ka mga indibidwal matapos nagapatigayon nag iligal nga pasugal sa Sitio Carmel, Barangay Banica, Roxas City.
Ang mga nadakpan amo sanday Alyas charlot 52 anyos, alyas helen 54 anyos, alyas Stephen 45 anyos, kag si alyas Zorieda 65 anyos nga lunsay mga residente sang nasambit nga lugar.
Sa interview sang Bombo Radyo kay Police Chief Master Sargent Ramil Arcangeles, spokesperson sang Roxas Component City Police Station, iya ginpahayag nga nagpatigayon sang operasyon ang mga katapo sang intelligence Section sang Roxas City PNP kag gilayon nga nadakpan ang mga indibidwal nga nagapatigayon sang “Pusoy Bahig,” isa ka illegal nga sugal.
Suno kay Arcangeles, madugay na nga ginamonitor sang mga otoridad ang amo nga lugar .
Narekober naman sa mga indibiwal ang P300 nga taya, 52 ka playing cards kag mga kagamitan nga gingamit sa pagpatigayon sang iligal nga pasugal.
Kaso nga paglapas sa RA 9287 ukon Anti-Illegal Gambling Law ang pagaatubangon sang mga nagkaladakpan.
Sa subong, yara na sa kustodiya sang Roxas Component City Police Station ang mga indibidwal para sa nagakaigo nga disposisyon.
