MAAYON CAPIZ – Duha ka separado nga kaso ang paga-atubangon sang isa ka lalaki matapos makuhaan sang armas luthang kag ginapahayag granada sa Barangay Cabungahan, Maayon, Capiz.
Ginkilala ang nadakpan kay alyas “Ryan”, 36-anyos, driver kag residente sang nasambit nga lugar.
Sandig sa impormasyon nga nakuha sang Bombo Radyo nagikan sa Maayon Municipal Police Station, natigayon nga madakpan si alyas “Ryan” pinaagi sa mas ginpasangkad nga OPLAN PAGLALANSAG OMEGA nga operasyon.
Magapangatubang ini sa kaso nga RA 10591 ukon Comprehensive Law on Firearms and Ammunition kag paglapas sa R.A 9516 ukon Illegal Possession of Explosives.
Ang nasambit nga mga Search Warrant ang gin-isyu kag ginpirmahan ni Hon Lorencito B. Diaz, Executive Judge sang RTC 6, Branch 17, Roxas City, Capiz kag napetsahan Enero 8, 2025.
Mahibaluan nga nakuha sa paghinakop sini ang 1 unit sang caliber .38 revolver nga armas luthang, 4 bala sang caliber .38 revolver nga armas luthang, 3 ka bala sang caliber .45 pistol nga armas luthang, 1 sling bag caterpillar nagaduag itom, 1 Fragmentation hand grenade kag 1 ka medyas nga nagaduag itom.
Sa karun, nagapabilin sa kustodiya sang Maayon MPS ang nasambit nga persona para sa nagakaigo nga disposisyon.
