Ginpasalig sang Armed Forces of the Philippines (AFP) ang ila bug-os nga kooperasyon sa mga otoridad sa tion nga magluntad ang pormal nga imbestigasyon sa kontrobersyal nga flood control scam, kadungan sang hugot nga pagklaro nga indi na kabahin sang militar ang mga implikado nga ex-Marines.
Suno kay AFP spokesperson Col. Francel Margareth Padilla, ang mga ex-soldiers nga gin-alegar nagserbisyo bilang bagmen ni Former ako-bicol Partylist Representative Zaldy Co ang madugay na nga nagseparar sa serbisyo, rason nga naga-operate na lang sila sa ila private capacity.
Ginpanindugan sang opisyal nga wala nagarepresentar ang nasambit nga mga indibidwal sa panindugan sang AFP.
Apang, ang institusyon nagatindog sa transparency kag accountability kon ang ila bulig kinahanglanon sa imbestigasyon.
Bilang background, ginbuyagyag ni Former Congressman Mike Defensor nga may yara sang 18 ka mga anay Marines nga luyag magtestigo sa atubang sang Ombudsman, lakip na si Atty. Levito Baligod, pinaagi sa joint affidavit agud magbulig sa kaso may kaangtanan sa floodgate irregularities nga ginpalab-ot ni Master Sgt. Orly Regala Guteza.
Matandaan nga gin-ako sang anay myembro sang Philippine Marines nga nakadul-ong ini sang maleta nga may unod nga kwarta sa balay ni President Ferdinand Marcos Jr. sa Forbes Park, Makati kag sa Ilocos Norte.
