Nabaton na ni Senate Secretary General Renato Bantug nagikan kay House Secretary General Reginald Velasco, ang kopya sang articles of impeachment batuk kay Vice President Sara Duterte.
Ini matapos gin-endorso sang 215 nga mga miyembro sang Kamara ang impeachment complaint batuk kay VP Sara.
Mahibaluan nga ang tikang naglab-ot sa halos duha ka bulan, sumugod nga ginfile ang tatlo ka mga impeachment complaints batuk kay Duterte sa manubo nga panalgan sang Kongreso.
Suno kay Senador Ronald “Bato” dela Rosa, kilala nga kaalyado ni VP Sara, ginalauman na niya nga ma-impeach ang bise sa Kamara.
Pahayag pa sang Senador nga nakit-an niya sini ang mga pagtimakas sang mga Kongresista nga pahalinon ang bise presidente.
Pagtiaw pa nga pahayag sini nga indi sang patas bangud sila nga yara sa Kamara nagapangampanya na samtang sila sa Senado kinahanglan pa nga himuon ang ila obligasyon bilang isa ka Senator Judge.
Mahibaluan nga si dela Rosa ang re-electionist sa pagkasenador.
Dugang pa sini nga ang impeachment isa ka political exercise apang bilang magatindog nga hukom ipabilin sini nga mangin patas sa pihak sang maayo nga pagsulundan kay VP Sara.
Bangud katapusan nga adlaw sang sesyon sang Kongreso, ginsiling ni dela Rosa nga posible sa Hunyo na ukon pagkatapos pa sang eleksyon ini ma-tackle sa plenaryo sang Senado.
Samtang, gintugyan naman ni House Secretary General Reginald Velasco sa Senado ang pagahiwaton sa impeachment sang duha ka panalgan sang Kongreso.
Apang, constitutional mandate suno diri sang Senado nga sabton ang impeachment complaint.
Ginsiling pa ni Velasco nga mahimo mag-convene ang Senado subong nga mag-break bangud ini legislative function sang mataas nga panalgan.
Sa tion nga mag-convene nakapreparar naman suno diri ang mga magatindog nga prosecutor sa Kamara.
