ROXAS CITY – Pilas sa tiyan ang naangkon sang isa ka mister matapos nga ginbuno ini sang iya kaugalingon nga asawa sa Barangay Agojo, Panay, Capiz.
Ang bana ang ginkilala kay alyas “Roberto” 58-anyos, samtang ang misis ang ginkilala kay alyas “Geraldine” 59-anyos, nga lunsay mga residente sang nasambit nga lugar.
Sandig sa impormasyon nagikan sa Panay MPS, nga alas-9:55 kagab-i, Abril 22, sang nag-abot sa ila balay ang mister nga yara sa impluwensiya sang makahulubog nga ilimnon kag nagamaoy.
Ginaalegar nga nagpatunga ang indi pag-intindihanay sa mag-asawa, nga gilayon man nagtambag ang ila bata nga babayi.
Apang, ginaalegar nga ginluok sang amay ang iya nagtambag nga bata, rason nga nagpadulong ang misis sa ila kusina kag nagkuha sang kutsilyo kag gilayon ginbuno ang iya bana sa tiyan.
Bangud diri, ginpadangat ang napilasan nga mister sa pinakamalapit nga ospital nga padayon sa karon nga ginabulong.
