ROXAS CITY – Ginkakibot sang pila ka pumuluyo kag tanod nga yara sa Barangay Hall sang Dinginan ang paghampak sa likod sang ila Barangay Kagawad nga si Romeo Agusan sa bana sang Punong Barangay nga si Kapitana Elizabeth Santiago sang Setyembre 14, alas 9:30 sang aga.
Sa interview sang Bombo Radyo kay Mr. Aurelio Santiago, bana sang kapitan kag ginaalegar ginhampak sa likod, suno sa iya palamangkutanon sa gihapon ang ginhimo nga aksyon ni kagawad.
Suno kay Aurelio nga nagalantaw lang kuntani siya sa paghusay sang lupon sa Barangay Hall sang hinali nalang nagsinggit si Agusan nga “indi dira mag-intra” kadungan sa mabaskog nga paghampak sa iya likod.
Gintul-id ni Aurelio nga wala man ini siya nagaintra kag nagapamati lang kuntani.
Gilayon naman nga naglakat si Agusan apang ginlagas siya ni Aurelio kun sa diin ginkompronta niya ini kun ngaman ginhimo niya adto apang wala ini nagsabat kag nagdiritso lakat.
Makatilingala man suno diri bagud wala man sila sang daan nga hiligut-anon kag masami pa nga nagakadto sa ila puluy-an kag nagapangkape si Agusan ngna ginakabig niya pamilya.
Mahibaluan may nauna na nga kaso si Agusan may kaangtanan sa trespassing apang nahusay na ini.
Natalana naman nga magpahusay si Aurelio sa ila Barangay nga tubtob sa karon ginabatyag pa ang sakit tuga sang pagpanghampak sa iya likod.
Panawagan sini kay Brgy. Kagawad Agusan nga indi na pagliwaton ang iya ginhimo bangud magatuga ini sang dugang niya nga kasaypanan.
