Naglab-ot na ang ashfall sa pila ka lugar malapit sa Bulkan Kanlaon sa Negros Occidental matapos naglupok ini kaina sang aga sang Martes, Abril 8 nga nagdugay sang halos isa ka oras.
Suno kay Philippine Institute of Volcanology and Seismology (Phivolcs) Director Teresito Bacolcol, pila sa mga lugar nga apektado sang ashfall amu ang Bago City, La Castellana, kag La Carlota City nga nakumpirmar nga nakabalhag sang light ashfall.
Sa separado nga post sang DOST-PHIVOLCS kaina sang aga, partikular nga gintumod ang Barangay Cubay, San Miguel, kag La Granja sa La Carlota City nga naapektuhan sang ashfall.
Ginpaandam naman sang opisyal nga delikado sa ikaayong lawas sang tawo sa tion nga mahaklo ang ashfall nga mahimo nga magtuga sang iritasyon sa mata, ilong kag tutunlan subong man mahimo ini nga makapalala sa mga may respiratory illness kasubong sang asthma.
Gin-abisuhan naman sang non-government organization nga Philippine Emergency Alerts Monitoring Center ang mga residente sa nasambit nga mga lugar nga magsuksok sang face mask para malikawan nga mahaklo ang abo gikan sa bulkan.
Kun mahimo suno diri, magpabilin na lamang sa sulod sang balay kag sartaduhon ang tanan nga pertahan kag bintana agud indi magsulod ang ashfall.
