ROXAS CITY, CAPIZ- Nagbilin sang dako nga halit sa sektor sang agrikultura sa probinsya sang Capiz ang asud-asod nga bagyo nga nag-agi sa pungsod subong nga bulan sang Hulyo 2025.
Sa interview sang Bombo Radyo kay Mr. Raoul Perez, Provincial Agriculturist sang Department of Agriculture Capiz, iya ginpahayag nga may yara sang pito ka mga kabanwahanan ang nahalitan sang malain nga tyempo diri sa probinsya.
Sa diin naglab-ot sa kabug-usan 2,067 ka mga mangunguma ang naapektuhan, kag 1,939.68 ka ektarya sang ulumhan ang nasira.
Samtang, siling pa ni Perez, may koordinasyon na nga ginapatigayon ang ila nga talatapan sa national agencies agud nga makapangayo sang bulig ang mga naapektuhan nga mga mangunguma sa probinsya.
Suno sa iya, nakapanagtag na sang 370 ka sako tanan sang mga binhi apang madugangan pa ini pagmafinalize na sang national ang data sini.
Nahibaluan nga sa idalom sang cropping insurance, makaagom sang bulig nagikan sa Department of Agriculture ang mga naapketuhan nga mangunguma.
Pahayag naman ni Perez, nga nagapadayon naman ang ila nga talatapan sa pagmonitor sa tagsa ka mga banwa agud nga gilayon nga mahatagn sang bulig ang mga naapektuhan nga mga mangunguma sa probinsya sang Capiz.
Interviewed by Bombo Francis Biñas
