ROXAS CITY, CAPIZ- Nagbilin sang halit sa sektor sang agrikultura ang asud-asod nga mga bagyo nga naeksperyensyahan sa probinsya sang Capiz.
Sa interview sang Bombo Radyo kay Mr. Raoul Perez, Acting Provincial Agriculturist sang Office of the Provincial Agriculturist-Capiz, iya ginpahayag nga madamo sang mga ulumhan sa probinsya ang naapektuhan sang mga pagbaha.
Suno kay Perez, sa gihapon may pila pa ka mga uyapad ang nagapabilin nga ginabaha kasubong sang sa banwa sang Sigma.
Pahayag nya, bangud sang amo nga mga bagyo, sandig sa datos sang ila nga talatapan sang Nobyembre 7, las 10:00 sang aga nga data, sa inisyal nga kalkulasyon, nagdangat na sa masobra P1.2 Million ang halit nga ginbilin sa palay kag mais sang Bagyo Tino palang kag wala pa madala ang sa kay Uwan.
Yara naman sa 98 ka mga rice farmers ang affected, sa diin 16 ang nagikan sa Dumarao kag 82 sa Pilar, kag 67.29 hectares sang mga ulumhan ang apektado. Subong man, yara sa 24 tanan ka mga corn farmers, apat nagikan sa Pilar kag 20 ang nagikan sa Jamindan ang naapektuhan kag 17 hectares sang talamnan sang mais.
Dugang pa ang natungdan, may yara naman sa subong nga ginadihon ang ila nga talatapan aguud nga mahatagan sang bulig kag igtalupangod ang mga mangunguma nga naapektuhan.
Gin-athag naman sang natungdan nga ang datos nga ginpaguha ang inisyal pa lamang kag posible pa nga madugangan bangud sa nagapadayon pa ang pagtipon sang datos sang ila nga talatapan.
Interviewed by Bombo Francis Biñas
