Roxas City – May yara na sang ginalantaw nga person of interest ang katapo sang Roxas City PNP sa nagluntad nga asud-asud nga pagpanghold-up sa pila ka mga lugar sa syudad sang Roxas.
Sa interview sang Bombo Radyo kay Plt. Col. Francisco Paguia OIC Chief of Police sang Roxas City PNP, ginpahayag sini nga posible isa lamang ka grupo ang yara sa likod sang pagpanghold-up sa syudad.
Mahibaluan kadungan sang pagpungko ni Paguia bilang bag-o nga hepe sang Roxas City PNP, duha ka pagpanghold-up ang nagluntad sa syudad sa diin ginkahangawa sang mga Capiznon sa ila kaluwasan.
Suno kay Paguia bilang bag-o nga hepe, ginasiguro nila nga himuon sang ila talatapan ang ila masarangan agud madakpan ang mga suspetsado nga nagahimo sang krimen sa syudad pina-agi sa pagpahamtang sang mga kapulisan sa mga lugar nga masami ginatumpukan sang mga tawo ilabi na pag-abot sa kagab-ihon.
Angut sini, nagpasiguro man suno diri si Roxas City Mayor Ronnie Dadivas nga magabulig agud kag maghatag sang suporta sa mga tikang nga ila ipatuman para sa kahilwayan kag kaluwasan sang mga Capiznon.
Dugang pa sang hepe, kinahanglan nga bantayan sang mga ginikanan nga bantayan ang ila mga kabataan nga nagaguha kag nagalagaw sa tion sang kagab-ihon kag sa diin nagakadto agud malikawan ang indi maayo nga hitabo.
Mensahe sini sa publiko nga indi magkahadlok nga maglagaw sa syudad bangud yara ang mga kapulisan nga handa magbulig sa tion nga may yara sang mga indi maayo nga hitabo kag sa mga nagakinahanglan sang bulig.
