Ginhatagan pagtamod sang Korte Suprema sa Indonesia, ang mga wala nagapati sa Dyos bilang ‘wala sang lugar agud hatagan sang kinamatarong sa pungsod.
Ini matapos ginbasura sang Indonesia Constitutional Court sadtong tinalikdan nga bulan subong nga tuig ang ginahinyo agud hatagan sang kinamatarong ang mga wala nagapati kag mga atheists kung sa diin nadesisyunan sang korte nga kinahanglan magpahayag sang relihiyon ang kada indibidwal sa Indonesia, apisar nga isa ka minority nga relihiyon subong man sa mga opisyal nga dokumento sang mga ini kag mangin ang marriage contract kinahanglan nakabutang ang relihiyon.
Mahibaluan nga ang Indonesia, ginakabig bilang may pinakadako nga populasyon sang mga Muslim sa bilog nga kalibutan kag opisyal nga nagakilala sa anum nga relihiyon sa pungsod kaangay sang Islam, Protestantism, Catholicism, Buddhism, Hinduism, kag Confucianism.
Samtang ang mga iban nga nagapati sa minority nga relihiyon masami nga nakaeksperyensya sang diskriminasyon, kaangay sang mga atheist kag wala nagapati nga siya naman wala ginakilala sang layi sadto.
Ang kaso, nagsugod sadtong 2012, sa ngalan ni Alexander Aan, isa ka civil servant, matapos ma-sentensiyahan sang 30 bulan nga pagkapreso bangud sa pagpalapta sang atheist nga mga pagtuon sa social media sini.
Apisar ang criminal code sang Indonesia, nagasilot lamang sa mga blasphemy kag pagpalapta sang atheismo, wala sini teknikal nga ginasilutan ang kadulaan sang relihiyon nga ginapatihan.
Matandaan nga sadtong Enero 2024, gintugutan sang Constitutional Court ang mga indibidwal nagikan sa mga minority nga relihiyon nga indi kalakip sa anum nga opisyal nga ginakilala nga relihiyon sa pungsod nga magaparehistro bilang “mga nagapati” sang wala ginatumod ang partikular nga relihiyon sa ila mga identity card.
Ginalauman nga ang kampanya, magabukas sang posibilidad para sa isa ka option sang mga Indo nga “wala sang relihiyon”.
Apang, ang paglaum para diri nakuha sang duha ka agnostic activists nga sanday Raymond Kamil kag Teguh Sugiharto, nga nagplastar sang petisyon sa Constitutional Court sadtong Oktubre agud tugutan ang mga wala nagapati nga bayaan sang blangko ang field sang relihiyon sa ila mga opisyal nga dokumento.
Sa isa ka desisyon nga ginpaguha, ginbalibaran ni Constitutional Court Justice Arief Hidayat ang petisyon nga nagasiling ang pagpati sa relihiyon “isa ka kinahanglanon” suno sa Pancasila, ang nagapanguna nga ideolohiya sang Indonesia.
