Gintudlo ang negosyante nga si Charlie “Atong” Ang bilang mastermind sa pagkaladula sang missing nga manugbulang suno sa isa sa mga akusado sa kaso nga si Julie “Dondon” Patidongan.
Magluwas kay Atong Ang, gin-angut man ni Patidongan ang aktres nga si Gretchen Barretto sa pagkadula sang mga manugbulang.
Gintuad man sini nga ang mga missing nga manugbulang ang ginpamatay na.
Si Patidongan ang isa ka Chief Security sa mga farm kag mga arena sang bulangan ni Ang.
Pahayag pa niya nga si Atong Ang kag si Eric Dela Rosa, Engineer Celso Salazar, ang mga mastermind sa mga nagkaladula nga manugbulang.
Si Dela Rosa suno diri ang nagabantay sa mga hampang sang bulang agud matumod ang mga nagadinaya kag gina-report ang mga nadakpan kay Ang, apang ginakunsulta anay kay Salazar.
Gintuad man ni Patidongan nga ang mga pulis ang ginamanduan agud asikasuhon ang mga manugbulang nga ginapahayag nagadinaya sa mga hampang.
Gindugang pa ni Patidongan nga si Barretto ang may ihibalo man sa mga nagakatabo.
Si Patidongan ang isa sa anom ka akusado sa pag-abduct sa mga manugbulang nga gin-report nga nadula halin 2021 tubtob 2022.
Sang ginpamangkot ini kun ngaa pila pa ka tuig ang nagligad antes niya ginuyagyag ang isyu, ginsiling ni Patidongan nga nagapati siya nga indi sarang suhulan ni Ang si Philippine National Police Chief General Nicolas Torre III.
Gin-athag man sini nga wala siya sang kahilabtanan sa mga pag-abduct bangud suno sa iya isa lang siya ka suluguon kag farm manager.”
Samtang, ginpahayag naman sang kampo ni Ang nga magapasaka sila sang reklamo batuk kay Patidongan subong nga adlaw sa Office of the Prosecutor sa Mandaluyong.
Apang suno kay Patidongan, wala siya sang ginakabalak-an angut diri.
Ginpanginwala niya man nga nagabaton siya sang kwarta halin sa negosyante kabaylo sang pagbawi sang iya nga mga pahayag.
Ginganyat naman ni Patidongan si President Ferdinand Marcos nga manduan ang mga otoridad nga resolbahon ang isyu para sa pamilya sang mga biktima.
