Mahimo nga yara sa Cambodia ukon Thailand ang ginapangita nga negosyante si Charlie “Atong” Ang.
Suno sa Department of the Interior and Local Government (DILG), ini ang base sa impormasyon nga ila nabaton gikan sa whistleblower nga si Julie Patidongan. Ginpahayag man ni DILG Secretary Jonvic Remulla nga may ikasarang si Ang nga magbiyahe padulong Cambodia paagi sa ginatawag nga backdoor agud malikawan ang mga otoridad.
Dugang pa ni Remulla, may ginapatigayon nga online sabong operation si Ang sa Cambodia, gani ginapatihan nga madamo na ini sang koneksyon nga mga opisyal didto, pati na sa Thailand.
Kun mapamatud-an nga yara gid si Ang sa Cambodia ukon Thailand, iga-idulog sang DILG ang impormasyon kay Presidente Ferdinand Marcos Jr. agud matalakay kag matukiban kun ano ang angay nga masunod nga tikang. Una na ginpahayag sang Presidente nga prayoridad sang administrasyon ang kaso sang mga nadula nga sabungero, kun sa diin ginakabig nga mastermind si Atong Ang.
