ROXAS CITY – Kumpirmado nga nagwithdraw na bilang legal counsel sang ginatudlo utok sa 25 Days Double your Money Investment Scheme si Atty. Atlas Catalan.
Sa exclusive interview sang Bombo Radyo kay Atty. Catalan, ginpahayag sini nga epektibo sang Pebrero 20, 2021 nagwithdraw na ini bilang legal counsel ni Junelyn Gregorio.
Ang mayor nga rason nga gintumod ni Catalan amo ang wala pagtuman ni Gregorio sa iya ginpromesa sa mga uplines kag investors nga maga-pay out sila saNG Pebrero 20, 2021, Sabado nga adlaw.
Suno sa abogado nga importante sa iya ang pagtuman sa ginpasalig sa mga investors, bangud diri nakasalalay ang kredibilidad sang isa ka indibidwal.
Indi luyag ni Catalan nga sa pila ka adlaw indi na siya pagpatihan sang mga pumuluyo bangud sa pagsakdag sa tawo nga wala sang hinambalan.
Nahibaluan nga mismo sang Sabado nga adlaw matapos nga wala sang natabo nga pay out sa investments sang mga investors, nagpadulong ang mga ini sa ila puluy-an bangud wala na ginasabat ni Gregorio ang mga tawag sa iya sang mga uplines nga naghulat sa iya mga ginpasalig.
Katapusan sila nga nag-estoryahanay ni Gregorio sang Miyerkules nga adlaw sa diin sang iya ginpamangkot, nagpasalig man ini sa iya nga madayon ang iya ginpromesa nga pay-out sa mga investors.
Apang nagguwa sang ulihi nga liwat sila ginpromesahan ni Gregorio nga ma-pay out sa Pebrero 28 kag sa bulan sang Marso.
Aminado si Catalan nga personal sini nga gin-imporma si Gregorio sa pagwithdraw bilang legal counsel, apang nagpangayo ini sang duha pa ka semana agud makapa-pay out siya sa mga investors.
Pila ka adlaw antes ang ginbantayan nga pay out, nakasugtan nga si Gregorio ang maga-atubang sa mga investors kag ini ang magadistribute sang ila ma-pay out.
Samtang gindepensahan ni Catalan ang pangalan ni Governor Esteban Contreras II batuk sa alegasyon nga may kahilabtanan ang amay sang probinsiya sa 25 Days Double your Money Investment Scheme.
Suno sa abogado nga wala sang kaangtanan diri ang gobernador kag ang iya nga pagbaton bilang legal counsel ni Gregorio ang separado sa iya trabaho bilang consultant sang provincial government.
