ROXAS CITY – Gin-appoint bilang bag-o nga general manager sang Metro Roxas Water District (MRWD) Board si Atty. Dante Arcangeles nga magadumala sa MRWD sa mga lugar sang Roxas City, Panitan, Ivisan kag Panay matapos nga nagretiro na si Engr. Glenn Delgado.
Sa interview sang Bombo Radyo kay Atty. Arcangeles, ginsiling sini nga nalipay gid ini sa bag-o nga katungdanan kag luyag pa sini nga mapanami kag mapalapad pa ang serbisyo nga igahatag sang MRWD.
Suno kay Arcangeles, matapos nga nagpungko ini bilang Acting General Manager sa sulod sang 9 ka bulan, nakit-an sini nga madamo pa sang kinahanglan nga i-improve pag-abot sa paghatag sang serbisyo nga makabenepisyo ang mga kunsumidor.
Pagatutukan sini ang ginadihon nila nga water security plan, kun sa diin tinutuyo sini nga makaangkon sang bastante nga suplay sang tubig sa sulod sang 24 oras kag pasanyugon ang welfare sang kunsumidor.
Kabahin man sang iya plano, amu ang mga pamaagi agud mas madali pa gid ang pagbayad sang mga consumers.
Magluwas sini, may programa man ini nga makabenepisyo sa ila empleyado bangud nagapati si Arcangeles nga kun tatapon kag trataron sang maayo sang ila opisina ang ila ka empleyado mapakita man nila ini sa mga kunsumidor.
Tuman naman ang pagpasalamat ni Arcangeles, sa tanan nga nagpati sa iya agud dumalahan ang MRWD.
