Nagpaguha na ang Australian government sang isa ka travel advisory agud pahanumduman ang mga pumuluyo sini nga maghalong sa pagbiyahe sa Pilipinas, ilabi na kun magapadulong sa Mindanao.
Ini ang raosn na man sa mga ‘security risks’ sa nasambit nga rehiyon, kasubong sang mga pagpamahog sang terorismo kag mga serye sang kinagamu.
Nakasaad sa nasambit nga advisory nga nagalala ang pagpamahug sang mga demonstrasyon kag civil unrest bangud sa pila ka serye sang mga panghitabo.
Bangud diri, ginpahanumduman sang gobyerno sang Australia ang mga pumuluyo sini nga likawan ang magpadulong ukon makigbahin sa mga protesta kag mga dalagkuan nga pagtililipon bangud posible nga mangin bayolente ang mga ini.
Ginpaandaman man diri ang posible nga pagpamahog sa mga transport kag essential service, rason nga gina-advisan nga tumanon ang guidance sang local authorities.
Hatagan pagtamud man sa advisory nga may pagpamahug sang pag-atake sa mga public area kasubong sang mga paluparan, hotel, shopping mall, restaurant, simbahan, kag iban pa nga dalagkuan nga tourist area.
Kalakip sa mga lugar nga partikular nga gintumod ang central kag western Mindanao, kaupod na ang Zamboanga Peninsula, Sulu, kag Southern Sulu Sea kun sa diin mataas umano ang banta sang terorismo kag pagpangidnap.
Una na nga nagpaguha ang U.S. Embassy nga nakabase sa Pilipinas sang kapareho nga advisory lima ka adlaw bag-o ang advisory sang Australia.
Gintumod man sa advisory sang U.S. magpamahug sang kidnap for ransom activities sa pila ka mga lugar sa Western Mindanao kasubong sang Zamboanga del Norte, Zamboanga del Sur, kag Zamboanga Sibugay.
