Gin-anunsyo sang Australian Prime Minister Anthony Albanese nga kilalahon sang Australia ang estado sang Palestine sa palaabuton nga sesyon sang United Nations (UN) General Assembly sa Septyembre 2025.
Suno kay Albanese, ang desisyon ginhimo matapos nga nakuha sang Australia ang mga commitments gikan sa Palestinian Authority, lakip na ang demilitarization, paghiwat sang eleksyon, kag padayon nga pagkilala sa Israel sa rehiyon.
“It is humanity’s best hope,” siling ni Albanese, may kaangtanan sa duha ka estado nga solusyon para sa paghidait sa Middle East.
Hugot nga ginpamatukan sang Israel ang nasambit nga lihok, sa diin ginpahayag sini nga ginpadyaan sini ang mga terorista, ilabi na nga nagapadayon ang opensiba sini batok sa Hamas sa Gaza, sa diin masobra 61,000 ka mga tawo ang ginreport nga napatay halin sang 2023 suno sa health ministry nga ginapadalagan sang Hamas.
Sa pihak nga bahin, ang Palestinian Authority nagsiling nga ang pagkilala sang mga pungsod isa ka pamatuod sang nagadamo nga suporta para sa kinamatarong sang mga Palestinian sa pagdeterminar sang kaugalingon.
Ginpasalig man ni Albanese nga indi sini paghatagan sang papel ang Hamas sa bisan ano nga palaabuton nga pagpasilabot sa Palestine.
Samtang, ginpanindugan naman sang Estados Unidos nga indi sini pagkilalahon ang estado sang Palestine sa subong bangud sa kakulang sang epektibo nga gobyerno.
Ginpakamalaut man ni Israeli PM Benjamin Netanyahu ang Australia kag ang mga pungsod sa Europa sa ila tikang, nga ginatawag ini nga “makahuluya.”
