Nangin-agaw atensyon sa New Zealand ang kaso sang isa ka ido nga si Nuggi nga na-rescue halin sa iya tag-iya sa Auckland sang Oktubre 2021.
Sang nag-abot ini sa pagtatap sang Royal New Zealand Society for the Prevention of Cruelty to Animals, nagabug-at na ini sang 53.7 kilos kag indi na gid madala sang tiil ang kabug-aton sang iya nga lawas sini.
Suno sa mga nag-rescue kay Nuggi, bisan nga dies metros lang ang kalayuon sang ginalakat sini, tatlo ka beses gid nga nagapundo si Nuggi bangud indi na ini makaginhawa.
Bangud sa tuman nga tambok sa lawas sini, indi na halos ma-detect sang mga doctor ang iya heartbeat magluwas pa gid sa gin-suprer sini nga conjunctivitis. May mga pilas man ini sa tiyan bangud ginapatihan nga nagaduot ang ini nga parte sang iya lawas sa duta bangud indi na gani makahulag ini.
Bal-an mo bala kun ngaa natabo ini kay Nuggi?
Base sa imbestigasyon sang mgaa otoridad, ginahatagan ini sang tag-iya sang walo tubtub 10 ka parte sang manok kada adlaw kag may yara pa gid sang doggy biscuits.
Wala gid sang hinalung-ong ang tag-iya nga halos ginapatay na sini ang ido bangud sa iya pagpakaon sa iya.
Duha ka bulan pa ang gintinir sang ido sa pagtatap sang rescue group kun sa diin nagdangat sa 8.9 kilos ang ginbuhin sa iya bug-at, apang sang ulihi, napatay gid ang sapat bangud sa hemorrhage. Base sa necropsy, nagsuprer ini sang health complications lakip na ang liver disease.
Ginkasuhan ang tag-iya bangud sa overfeeding kag sang sini lang nga semana, nagdesisyon na ang Manukau District Court nga pabayaron ini sang $720, gindumilian nga magpanag-iya sang ido sa sulod sang isa ka tuig, kag ginsentensyahan man ini sang duha ka bulan nga pagka-preso.
Pinasahi man ini nga kaso sa New Zealand bangud masami nga malnourished animals ang ila ma-rescue, apang nagpaandam naman ang organisasyon nga makamalatay gihapon kag isa ka sala ang overfeeding sa mga sapat.
