Arestado ang 24-anyos nga babaye nga ginakabig high-value individual (HVI) sa ginpatigayon nga drug buy-bust operation sang kapulisan sa Roxas City, Capiz.
Ang arestado amo si alyas Judy residente sang Barangay Punta Tabuc, Roxas City.
Sa impormasyon nga nakuha san Bombo Radyo nagikan sa Roxas Component City Police Station, ginpahayag nga nakuha sa paghinakop sang arestado ang ginabanta 50 grams sang ginapatihan shabu nga may balor nga ₱340,000 kag isa ka homemade 38 caliber revolver nga wala sang serial number.
Kaso nga paglapas sa Republic Act 9165 ukon “Comprehensive Dangerous Drugs Act of 2002” kag Republic Act 10591 ukon “Comprehensive Firearms and Ammunition Regulation Act’, ang pagapangatubangon ni alyas “Judy.”
Sa subong, yara na ini sa Roxas Component City Police Station para sa nagakaigo nga disposisyon.
