Isa ka 26-anyos nga babaye ang nagparekord sa Roxas City PNP matapos gin-alegar nabiktima sang pagpanunto via online.
Ginkilala ang tagreklamo nga si Rosamae Fuentes sang Barangay 3, sining syudad.
Ba-se sa panaysayon ni Fuentes nagpadulong ini sa isa ka mall sa Barangay Lawaan para magpadala sang kuwarta sa tiya nga ginaalegar nagpangayo sang bulig.
Gintransfer sini ang P14,000 nga kuwarta sa GCash account sang tiya, apang nangin invalid ini sa first attempt.
Bangud diri, gin-alegar nga nagtext ang numero sang tiya nga nagpanugyan nga ipaagi ang kuwarta sa account ni Alfred Sy nga ginsunod naman sang tagreklamo.
Matapos nangin madinalag-on ang transaksyon, suno kay Fuentes nga liwat nagtext ang numero kag liwat nagapangayo sang dugang nga P26,000.
Bangud nagduda na si Fuentes, gintawagan sini ang bana sang tiya nga nakibot sang iya ginsugid nga nagpadala ini sang kuwarta bangud nagapangayo ini sang bulig.
Diri na kag nahibaluan sang tagreklamo nga gin-hack ang Gcash account sang iya nga tiya. Sa karon nagakasubo ang biktima bangud nabiktima ini sang pagpanunto.//
