ROXAS CITY – Arestado ang isa ka babaye matapos nga ginserbihan sang warrant of arrest sang mga otoridad sa Barangay Culasi, Roxas City.
Ang wala na ginhingadlan nga akusado ang nagapang-edaron sang 26-anyos kag ginakabig nga Top 7 Most Wanted Person sa probinsya sang Capiz.
Nagapangatubang ini sang kaso nga paglapas sa RA 9165 ukon Comprehensive Dangerous Drugs Act of 2002.
Ginserbe ang mandamiento de aresto nga gin-isyu kag ginpirmahan ni Presiding Judge Isabel E. Poco-Deslate sang Regional Trial Court, Branch 19, Roxas City nga napetsahan Hunyo 7, 2024.
Wala naman sang may ginrekomendar nga piyansa ang korte para sa temporaryo sini nga kahilwayan.
Nahibaluan nga madinalag-on nga nadakpan ang akusado sa ginkasa nga operasyon sang 1st Capiz Provincial Mobile Force Company nga ginpangunahan ni Police Lieutenant Colonel Ricardo Jomuad Jr., Force Commander.
Sa karon, yara na ini sa kustodiya sang Roxas City Police Station para sa nagakaigo nga disposisyon.
