ROXAS CITY – Dakop ang 35-anyos nga babaye, matapos ginapahayag nga nagpangawat sa Sitio Puntod, Barangay Dinginan, Roxas City 9:30 sang gab-i Marso 31, 2024.
Ginkilala ang biktima kay Juvy Alor 47-anyos driver kag residente sang nasambit nga lugar, samtang ang ginapahayag suspek ang ginkilala kay Janice Tiano alyas “Analyn Cabahug” residente sang Barangay Purisima, Manapla, Negros Occidental apang temporaryo nga nagapuyo sa Sitio Puntod, Barangay Dinginan sining syudad.
Sa impormasyon nga nakuha sang Bombo Radyo sa Roxas City PNP, ginapahayag nga takna 9:50 sang gab-i sang nakabugtaw si Alor kag nagpadulong ini sa sala.
Suno kay Alor sa iya pagpasiga sang suga, didto kag nakita sini ang suspek nga nagapungko sa bangko dala ang shoulder bag nga nagaduag pula kag naga-unod sang P5,000.00 nga cash.
Bangud sini, nagpangayo sang bulig ang biktima kag natigayon nga nadakpan ang suspek.
Sa karun yara na sa kustodiya sang Roxas City PNP si Tiano agud pasakaan sang nagakaigo nga kaso.
