Nasapwan nga patay ang isa ka babaye sa sulod sang simbahan sa Liloan, Cebu sang Biyernes sang aga, Oktubre 24, 2025.
Suno sa mga otoridad, may pilas sa ulo ang biktima kag may dugo sa iya ilong.
Dugang pa, nasapwan ang biktima nga nagahigda sa malayo nga bahin sang mga bangko sang San Fernando El Rey Parish Church sa Barangay Poblacion pasado alas 9:00 sang aga.
Suno sa kapulisan, gindala sa ospital ang biktima nga ginabulubanta naga-edad sang 30 anyos apang gindeklarar nga dead on arrival.
Suno sa isa ka staff sang simbahan, may nakabati sang pagsinggit sang babaye halin sa sulod sang simbahan. May isa man ka lalaki nga nakit-an nga nagguwa sa simbahan apang wala ini nakit-an sang mga taga-barangay sang ginpangita.
Ginpahayag nga wala na sang tawo sa simbahan pagkatapos sang alas 6:00 sang aga nga misa. Suno sa isa ka janitor, may nakita siya nga lalaki nga nagapungko sa sulod apang wala siya sang may nakita nga babaye nga kaupod sini.
Apang, sang iya ginkadtuan ang offering table, nakita sini ang biktima nga nagahamyangon kag nagadugo ang ilong.
Padayon pa ang imbestigasyon sang kapulisan kag gina-usisa man ang mga CCTV cameras sa lugar.
