Babayi nga maga-bisita sa iya live in partner nga napreso sa Panitan MPS, nakuhaan sang iligal nga droga

ROXAS CITY – Nakuhaan sang isa ka plastic sachet sang gina-alegar shabu ang isa ka babayi nga tuyo magbisita sa iya live-in partner sa Panitan Municipal Police Station takna alas 3:50 sang hapon, Setyembre 14.

Ini ang ginkilala kay Lorefe Mae Distor Cordial, 27-anyos kag residente sang Barangay Pantalan, Carles, Iloilo.

Sandig sa impormasyon nga nagikan sa Panitan Municipal Police Station, magabisita kuntani si Cordial sa iya live in partner nga naka-detain sa karsel sang nasambit nga police station, apang sang ginrikisa na ang iya sini nga dala, may nakit-an nga aluminum foil kag iban pa nga drug paraphernalias.

Bangud diri, ginrequest sang pulis nga ipakita ang sulod sang iya nga bulsa kag alsahon ang iya nga ginasuksok nga bayo kag didto na may nahulog nga papel nga may nakaputos nga gina-alegar shabu.

Mahibaluan, nga ang live-in partner ni Cordial ang isa sa persona nga nadakpan sa COMELEC Checkpoint sa Brgy. Poblacion Ilawod, Panit-an matapos nakuhaan sang calibre.45 pistol nga may isa ka magazine kag 7 ka mga bala.

Sa karon, yara na ini sa kustodiya sang kapulisan kag natalana nga pasakaan sang kaso nga paglapas sa Republic Act 9165 ukon Comprehensive Dangerous Drugs Act of 2002.