PANAY, CAPIZ – Pilason ang isa ka persona sa pagkasanggit sang motorsiklo sa isa man ka motorsiklo sa Barangay Cabugao Oeste, Panay, Capiz.
Ang napilasan ang ginkilala nga si George Diosana, 34 anyos sang Barangay Punta Tabuc, Roxas City.
Base sa nakuha nga impormasyon sang Bombo Radyo sa Panay Municipal Police Station, samtang ginasubay ni Daryl Detaro ang dalan sakay sa motorsiklo kaupod ang backrider nga si Diosana nga padulong kuntani sa Pontevedra, aksidente ini nga nasanggit sang motorsiklo nga ginamaneho ni Roly Liganzon, 31 anyos sang Barangay Cogon, Panitan.
Bangud diri, natumba ang motorsiklo nga ginamaneho ni Detaro rason nga napilasan si Diosana.
Gilayon nga gindala sa ospital ang napilasan nga biktima agud madapatan sang nagakaigo nga pagbulong.
Natumba man ang motorsiklo nga ginamaneho ni Liganzon kun sa diin nagtuyo pa ini magpalagyo apang nadakpan man kag gindala ini sa ospital agud mabulong.
