Padayon ang pag-monitor sang Barangay Anti-Drug Abuse Council (BADAC) sang Barangay Punta Tabuc, Roxas City agud matapna ang pagduging sang iligal nga droga sa lugar.
Sa interview sang Bombo Radyo kay Punong Barangay Nestor Buenviaje, iya ginpahayag nga may mga madamo sang mga tawo nga nagasulod kag nagaguwa sa ila barangay nga indi kilala ukon pamilyar ang nawong.
Bangud sini, ginpabaskog pa ang monitoring kag ginapatuman ang mas hugot nga pagbantay sa nasambit nga lugar.
Nagapanawagan ang barangay sa publiko nga magkooperar kag maghatag sang impormasyon sa mga otoridad agud malikawan kag matapna ang paglapnag sang iligal nga droga sa komunidad.
Nagpasalamat man ini sa padayon nga bulig kag suporta sang kapulisan sa pagpatuman sang mga operasyon kag pagbantay sa seguridad sang barangay.
Nahibaluan nga sa syudad sang Roxas City, nagapabilin ang Barangay Punta Tabuc nga ginakabig barangay hotspot bangud sa lokasyon, kadamuon sang populasyon kag mga aktibidad sa lugar, nga ginasundan sang Barangay Banica.
