Pagatutukan sang bag-o nga hepe sang Pontevedra Municipal Police Station ang pagpapas sang krimen sa banwa.
Sa interview sang Bombo Radyo kay Police Captain Dennis Losbañes , bag-o nga Hepe sang Pontevedra Municipal Police Station, iya ginpahayag nga top priority niya amo ang pagtapna sang tanan nga iligal nga aktibidad nga nagatuga sang krimen sa banwa kag sa probinsya sang Capiz.
Lakip diri ang kampanya batuk sa iligal nga droga, illegal gambling, illegal possession of firearms, kag sa pagdakop sang mga wanted person kag communist armed conflict.
Suno kay Police Captain Losbañes, magapatigayon ang ila nga talatapan sang symposium sa mga nagkalain-lain nga Barangay nahanungod sa mga illegal activities.
Pahayag pa niya, ang local government unit (LGU), barangay council kag mga pumuluyo sang banwa sang Pontevedra ang nagapalab-ot naman sang pagsuporta sa mga nasambit nga aktibidad.
Nagapanawagan man ang natungdan nga likawan ang pag-engage sa iligal nga aktibidad kag mag-kooperar sa kapulisan agud mapabilin ang kalinong kag katawhay sang palibot.
