ROXAS CITY – Pormal na nga nagpanumpa na kahapon nga adlaw bilang bag-o nga presidente sang Sri Lanka si Ranil Wickreminsinghe, nagtal-os sa nagbiya nga anay presidente nga si Gotabaya Rajapaksa.
Ini ang ginpahayag ni Mrs. Juvy Genite, Bombo International Correspondent direkta sa Sri Lanka, sang mainterview sang Bombo Radyo.
Suno diri, ba-se sa mga balita sa local media kag sa mga tawo sa ila pungsod, kadam-an sa mga tawo ilabi na sa mga protesters ang disgusto kay Wickreminsinghe.
Ini bangud kaalyado sang bag-o nga presidente ang pamilya Rajapaksa nga amu ang ginatudlo rason sa bankruptcy sang ila pungsod, apang ginapanginwala ini sang anay Prime Minister kag sa karon presidente na.
Dugang pa ni Genite nga antes paman ang COVID-19 pandemic, manami nga pungsod ang Sri Lanka, sa pagkamatuod madamo sang mga turista ang nagapadulong diri bangud barato ang ila mga commodities, apang sa panahon ni Gotabaya Rajapaksa, nagdamo ang ila imports ikumparar sa exports kag bangud sa promisa nga pagbuhin sang ila tax, madamo ang mga nagprotesta tubtob nagbiliya ang mga opisyal sang ila gobyerno.
Sa karon, plano ni Wickreminsinghe nga pagapasabton ang may kahimuan sa pagsunog sang ila puloy-an kag ang puwersahan nga pagsulod sang presidential kag prime minister’s office.
