ROXAS CITY – Nataban sang kawatan ang bag nga may unod nga kwarta nga nagabalor sang P36,000.00 kag liyabe sang salakyan nga ginapanag-iyahan sang isa ka manunudlo sa President Manuel Roxas Memorial School-South.
Sa interview sang Bombo Radyo kay Mr. Jose Richard C. Lachica, School Principal sang nasambit nga buluthuan, takna alas 7:30 sang Lunes samtang naga-attend ang manunudlo nga si Myleen Campos sa flag ceremony ginbilin sini ang iya bag sa classroom.
Apang pagbalik suno diri sang nasambit nga manunudlo sa classroom pagkatapos sang flag ceremony, wala na sini ang iya bag nga may unod nga kwarta kag liyabe sang salakyan.
Suno kay Mr. Lachica sang gin-review ang CCTV sa ila eskwelahan natumod ang suspek nga isa ka LGBTQ member nga si Nathaniel Hobane nga amo ang nagsulod sa classroom ni Campos.
Matandaan nga nabiktima man ni Hobane ang isa ka non-teaching staff sang Capiz National High School kun sa diin nakuha man sini ang bag nga may kwarta kag duha ka cellphone.
Base naman sa CCTV footage sang Capiz NHS makit-an nga bitbit pa sang suspek ang bag ni Campos.
Bangud sa natabo ginpahayag ni Lachica nga ila na pagahugtan ang seguridad sa PMRMS-South kag tubtob nalang sa guwa sang gate kag indi na pagpasudlon ang mga magadul-ong sa mga estudyante.
