Padayon nga gina-monitor sang Philippine Atmospheric, Geophysical and Astronomical Services Administration (PAGASA) ang sentro sang Bagyong Enteng nga yara sa kadagatan sang Vinzons, Camarines Norte.
Dala sini ang kabaskugon sang hangin nga 75 km/h malapit sa sentro kag pagmadlos tubtob 90 km/h. Nagahulag naman ini sa West northwestward direction sa kadasigon nga 10 km/h.
Samtang, ang Southwest monsoon ukon hangin habagat naman ang nagaapekto sa Western section sang Southern Luzon kag Visayas.
Bangud sini, lauman ang magal-umon nga panahon kag may posibilidad sang pag-ulan kag padaguob nga dala sang hangin habagat sa Western Visayas.
Kasarangan tubtob makusog naman ang huyop sang hangin sa Western Visayas nga magadala sang mabalud tubtob kasarangan nga balud sa kadagatan.
