MAAYON, CAPIZ- Sa pihak sang mabaskog nga sulog sang tubig kag dala nga peligro, nagpangarisgar ang pila ka mga residente sang Barangay Old Guia, Maayon, Capiz nga magsulong sa baha kag bitbiton ang ila nga mga motorsiklo para makapauli lang, matapos nga naabtan sang ulan ang lugar kag nagtuga sang pagbaha.
Sa interview sang Bombo Radyo Roxas kay Engineer Victoria Dampog, head sang Municipal Disaster Risk Reduction and Response Office (MDRRO) sang Maayon, iya ginpahayag nga bangod sa mabaskog nga pagbubo sang ulan ang rason sang madasig nga pagtaas sang tubig nga halos maglab-ot na ini sa hawak nga ginsabayan pa sang makusog nga sulog.
Bangud sini, indi makatabok ang madamo nga mga residente kag estudyante papauli, samtang ang iban man ang nagapangarisgar nga naglusong sa baha apisar peligroso, bitbit ang ila sini nga mga motorisklo samtang nagatabok sa tubig-baha.
Suno kay Dampog, nakatabok naman ang kadam-an sang mga na-stranded sang amat-amat na nga naghupay ang baha.
Nagpahanumdom man ang opisyal sa mga residente nga likawan ang pagtabok sa baha kun indi luwas ang kondisyon agud malikawan ang ano man nga sahi sang aksidente.
Padayon naman nga gina-monitor sang mga otoridad ang sitwasyon ilabi pa kag ginalauman pa ang mga pag-ulan sa mga masunod nga adlaw.
Interviewed by Bombo Jessa Mae De Los Santos
