Maswerte nga wala matigayon nga mabiktima ang mga tindera kag tag-iya sang isa ka balaligyaan sang duha ka foreigner nga nagpakita sang ginapahayag nga peke nga dolyar baylo sa P1,000 sa Barangay Cagay, Roxas City.
Sa interview sang Bombo Radyo kay alyas Victoria, tag-iya sang balaligyaan ginpahayag sini nga may nagsulod nga isa ka babayi kag isa ka lalaki nga foreigner nga mabakal sang bottled water sa ila balaligyaan. Nag-usisa kag nagpamangkot ang mga ini tuhoy sa kun ano ang nawong sang kwarta sang Pilipinas.
Ginpakitaan man sang mga biktima ang mga foreigner sang nagkalain-lain nga denominasyon sang kwarta sang Pilipinas kag ginpakitaan man suno sila sang lalaki nga foreigner sang 1-dollar kag gin-istorya nga bayluhan nila ini sang P1,000 apang wala man nagdesider ang tag-iya nga magpabaylo sang kwarta.
Dugang pa sini, ang istilo sang duha daw kaangay sang nagapang-budol, gina-entertain sang babayi nga foreigner ang mga tindera samtang ginahimo naman sang lalaki nga foreigner ang tikang nga mahimo mabudol ang tindera.
Maswerte naman nga wala sang may nataban ang amo nga mga foreigner sa nasambit nga balaligyaan.
Samtang, ang gingamit naman sang mga ini nga duha ka dolyar ang nabilin sa lugar kag base man sa pagpangusisa sang mga biktima sa ila pagbanta, peke ang amo nga kwarta.
