ROXAS CITY – Gintaban sang isa ka delivery boy sang tubig ang masulusubra P80,000 nga balor sang kagamitan, kwarta kag alahas sa Malipayon Village Barangay Tiza, Roxas City.
Ginkilala ang biktima kay Maternidad Daliva, 70-anyos samtang ang suspetsado ang ginkilala kay Erwin Baliskot, 27-anyos residente sang Locsin Village Pantalan Cabugcabug President, Roxas.
Sa nakuha nga impormasyon sang Bombo Radyo nagikan sa biktima ginpahayag nga natabo ang insidente sadtong domingo nga adlaw, nahibaluan sang suspetsado nga malakat ini sa Iloilo agud magpalubong sa iya himata, apang sabado sang hapon pa lamang nagkadto na ang suspek sa ila balay kag nagpakuno-kuno nga maga-deliver sang tubig nga sa pagkamatuod nagasurvey na ini sa palibot.
Ginpahayag pa sini nga temprano pa lang nagabalik-balik na ang suspek sa ka-iping nga balay kag naga-pamangkot kun may tawo ang nasambit nga balay.
Samtang, matapos ang pagpangawat natukiban nga lakip sa mga nataban sang suspek amu ang Laptop nga naga balor sang P45,000, alahas naga balor sang P20,000, pantalon nga original nga nagabalor sang 1,200, malahalon nga sunglasses nga naga balor sang P5,000, Cellphone, plantsa kag P12,000 nga kwarta kag iban pa.
Suno pa kay Daliva nga sa 47-ayos sini nga pagpuyo sa amo nga lugar, subong lamang ini natabu nga ginkawatan siya sa iya nga balay.
Sa karon, padayon pa nga ginpangita ang amo nga suspetsado agud mapanabat sa ginhimo nga pagpangawat.
