ROXAS CITY – Nangin makalangusbo ang eleksiyon para kay incumbent Capiz 1st district Board Member kag nagapapili sa pagkakongresista sang probinsya nga si Blesilda ‘Ging-ging’ Perez Almalbis.
Ini bangud magluwas sa iya pagkapierdi sa iya kandidatura ginlamon pa sang kalayo ang balay sini sa Barangay Baybay, Roxas City.
Base sa impormasyon nga nakuha sang Bombo Radyo Roxas sa talatapan sang Bureau of Fire Protection – Roxas City Fire Station, nakabaton sila sang report nga nagakasunog na ang balay ni Almalbis sa tunga sang padayon nga pag-isip sang mga boto sa bag-o lamang nagtakop nga eleksiyon.
Bangud diri gilayon nga nagresponde ang mga bombero gani madasig naman nga napalong ang kalayo sa nagakasunog nga balay nga nahimo sa concrete materials.
Daku man nga bulig ang pagbubo sang ulan agud mapadasig nga mapalong ang kalayo kag indi na ini naglapta pa sa iban nga parte sang balay.
Wala naman sang napagkit nga napilasan sa pamilya Almalbis nga madasig nakaguwa sang ila balay antes pa man nagalapta ang kalayo.
Sa karon nagapadayon nga ginaimbestigahan sang mga otoridad ang naglunta nga insidente agud matumod ang ginhalinan sanb sunog.
