ROXAS CITY – Panibag-o naman nga kaso sang pagpangawat ang narekord sa blotter entry sang Roxas City PNP sa kainitan sang ginapatuman nga enhanced community quarantine sa syudad sang Roxas kag probinsiya sang Capiz bangud sa coronavirus disease (COVID-19).
Nagreklamo sa istasyon sang pulisya ang 77-anyos nga si Wilfredo Arceño sang Sitio Arcabalo, Barangay Bolo, Roxas City matapos ginsulod sang kawatan ang iya puluy-an kag ginkawat ang ginabulubanta tres tobtob singko mil pesos.
Ba-se sa panaysayon ni Arceño nga ginapasiga sini ang suga sa iya hulot bangud nagaisahanon lamang ini sa ila balay kag yara sa tupad ang cellphone.
Apang sang nagbugtaw si Arceño para magkaon sang midnight snack,ginkatingala sini nga wala na nagasiga ang suga kag indi na makita ang cellphone.
Nagguwa ang biktima sa iya hulot para tsekyaron matapos nabatyagan nga kasubong may tawo sa guwa sang kuwarto.
Sa pihak sang kadulom may nakita ini nga gamay nga kasanag nga nagahulag sa diin diri sini nakumpirma nga may nagsulod nga kawatan sa balay kag ang nakita nga kasanag nga gikan sa suspek ang iya ginapangita nga cellphone.
