ROXAS CITY – Nagahilibion ang isa ka pamilya matapos nga totally burned ang ila puloy-an sa Sitio Pulo-Pulo, Barangay Agbanog, Pontevedra, Capiz.
Ginkilala ang tag-iya sang puloy-an kay Raffy Villareña, 39-anyos, mangingisda kag residente sang nasambit nga barangay.
Sandig sa inisyal nga imbestigasyon sang mga katapo sang Bureau of Fire Protection (BFP)-Pontevedra, natabo ang sunog sang Nobyembre 1, takna alas-7:00 sa gab-i, apang wala gilayon ini mapabalhag.
Suno naman kay Brgy. Kgwd. Conrado Buason, nga nagpadulong ang biktima kaupod ang tatlo sini ka mga menor de edad nga kabataan sa balay sang ila himata nga yara lang sa tabuk sang ila balay, agud magselebrar sang tig-kalalag.
Dugang pa diri, wala man sang kandila nga ginsindi ang nasambit nga pamilya sa ila balay.
Natalupangdan nalang sang mga ini nga nagakalayo na ang ila puloy-an.
Nagaguwa sa inisyal nga imbestigasyon sang BFP-Pontevedra nga faulty electrical wiring ang gintunaan sang sunog.
Masuwerte nga wala sang napilasan sa insidente.
Ginabulubanta nga may kahalitan nga P64,000 ang amu nga sunog kun sa diin himo sa light materials ang amu nga balay.
Sa karon padayon ang imbestigasyon sang mga bumbero sa nagluntad nga sunog.
