ROXAS CITY – Naghina ang negosyo sang mga manugbaligya sang karne sang baboy sa Teodoro Arcenas Trade Center (TATC) bangud sa ginapahayag epekto sang African Swine Fever (ASF) sa syudad kag probinsya.
Ini ang ginsiling ni ‘Bikbik’ isa sa mga meat vendor, sang mainterview sang Bombo Radyo.
Suno diri, tuman ka hina ang ila pamaligyaanay sumugod sang nakabalhag sang positibo nga kaso sang ASF sa syudad sang Roxas, rason nga P280 na ang kilo sang karne sang baboy nagikan sa P250, nga ila baligya.
Dugang pa sini, nga sadtong wala pa sang ASF, duha tubtob tatlo ka baboy ang ila ginakuha sa slaughterhouse kag nagakaubos ini sa merkado, apang sa karon, haluson nga mapaubos nila ang isa ka baboy.
Ginpasalig man sini sa mga bumalakal nga indi apektado sang virus ang ila baligya bangud nagagikan ini sa slaughterhouse.
Sa karon, wala man suno diri sila sang nabaton pa nga bulig nagikan sa lokal nga gobyerno, sa mga naapektuhan sang ASF.
