ROXAS CITY – Igapaidalum sa autopsy examination ang bangkay nga nasapwan sa kakugnan sa Brgy. Libas syudad sang Roxas agud mahibaluan kun may yara sang fracture ang katul-anan sini kag kun may posibilidad sang foul play.
Ini ang ginpahayag ni PLt. Col Aron Palomo, hepe sang Roxas City Component Police Station sang mainterview sang Bombo Radyo.
Sa inisyal nga imbestigayon sang kapulisan, ginabulubanta sa 40 pataas ang edad sang biktima kag indi pa matumod kun isa ini ka babayi ukon lalaki.
Suno diri, padayon sa gihapon ang imbestigasyon sang katapo sang kapulisan sa nasambitan nga insidente kag nag-request na ini sang medico legal sa Scene of the Crime Operation (SOCO).
Mahibaluan nga wala sang traces kag ebidensya nga narekober kag wala man may nabalhag nga missing person sa nasambit nga lugar.
Matandaan nga nakasuksok sang itom nga sweater, pula nga jersey shorts kag blue nga tsinelas ang biktima kag ginabulubanta nga masobra isa ka bulan na ini nga patay bangud yari na ini sa advance state of decomposition.
Samtang, nagapanawagan ang hepe sa publiko, pananglitan may nahibaluan nga himata ukon abyan nga nadula nga nagasuksok sang nasambit nga mga panapton mahimo nga magpadulong sa RCPS.
Sa karon yara na sa isa ka punerarya ang bangkay sang biktima.
